സ്നേഹവ്യാപാരം

പളുങ്കു ഭരണികൾ, വർണ്ണഗോലികൾ

നാവലിയിയ്ക്കും നാരങ്ങാമിഠായികൾ

കണ്ണഞ്ചിയ്ക്കും നിറസഞ്ചയങ്ങൾ

കാത്തിരിയ്ക്കും കുറുക്കൻ കണ്ണുകൾ

നോക്കി വെള്ളമിറക്കും നക്ഷത്രക്കുഞ്ഞുങ്ങൾ

അബദ്ധം വെളുപ്പിച്ച മാതാക്കൾ, പിതാക്കൾ

കുടുകുടെ ചിരിയ്ക്കും അവകാശദല്ലാളന്മാർ

സ്വർണ്ണനൂലെന്നു തോന്നിയ്ക്കും വീശുവലകൾ

ചുരണ്ടുവാൻ നഗ്നരാം ഫോണുകൾ

കരണ്ടുവാൻ കന്മഷ മാത്സര്യങ്ങൾ

മധുരപാനീയത്തിൻ ചവർപ്പുകൾ, മയക്കങ്ങൾ

കാമാതിരേകം ചമയ്ക്കും ആഹ്വാനങ്ങൾ

എവിടെയും പരസ്യപ്പലകകൾ പലതരം

എല്ലാമൊരേ വൃത്താന്തം, “സ്നേഹം”

സ്നേഹമൊരു വ്യാപാരം, വില്പനച്ചരക്ക്

കിതപ്പുകൾ, ഏമ്പക്കങ്ങൾ, സ്നേഹമൃഷ്ടാന്നം

നാടകാന്തം; കണ്ണീർക്കുടങ്ങൾ, ശവങ്ങൾ

തലവഴി മൂടിയും വിലങ്ങുകളണിഞ്ഞും

ജനാരവത്തിൻ ക്രൂരമാം വിനോദത്തിൽ

കാലയതി പോക്കുവാൻ വിധിയെഴും പേക്കോലങ്ങൾ