Wednesday, June 28, 2017

കാർക്കോടകം

വരിക കാർക്കോടകാ, വരിക
വന്നെന്റെ മാറു ദംശിയ്ക്കുക
കറുത്തൊലിയ്ക്കും കലിയിളകട്ടെ
കായം കരിവേഷമാടട്ടെ

തൊണ്ടയിൽ തിളയ്ക്കും കഫമൂറി
നോവിൻ ബോധാവേശക്കയ്പുകൾ
ക്രുദ്ധനാഡിയിൽ, ഞരമ്പുകളിൽ
നിണത്തിൻ നീലം പരത്തട്ടെ

എന്റെ പിതൃത്വം വസിയ്ക്കും കുഞ്ഞു-
ങ്ങളാവതില്ലാതെ നിർത്താതെ
പേക്കിനാക്കൂത്തിൻ ചുടലനൃത്തം
കണ്ട് കരയും, നൊന്ത് ഞെട്ടും

എന്റെ പ്രണയിനി എൻ ജളത്വ-
ത്തിൻ ഉൾഭയം അറിയാതെയെ-
ന്നരികത്തു പരിദേവനത്തിൻ
കെട്ടഴിച്ചു പഴിയ്ക്കും, പാവം

എന്റെ ചൂതാട്ടക്കളങ്ങളിലാ-
മോദമോടെ കരുക്കളായി
ചിന്തകളേറിയ ചിറകിന്ന-
ടിയിൽപ്പറ്റും ജയവ്യാമോഹം

ഇല്ല, ഹേ! കാർക്കോടകാ നിൻ ഫണം
ഹനിയ്ക്കയില്ല എന്റെ പാപം
എന്നിലെ ശാപത്തിന്നധോമുഖം
നിന്റെ നീലയിൽത്തുടുക്കില്ല

സ്വപ്നസഞ്ചാരമൊടുങ്ങും പാത-
കൾക്കറ്റത്ത് അശ്രുപൂജയാൽ
വാഴ്ത്താം ഞാൻ നിന്നെണ്ണക്കറുപ്പിനെ
മക്കളീക്കാളിമ മായ്ക്കട്ടെ